වර්තමානයේ දී වෛරසය ආසාදිතයැයි හඳුනා ගන්නා සේවකයින් තමන්ගේ නේවාසිකාගාර තුළ අනිවාර්ය නිරෝධායනයට යටත්විය යුතුය. විවිධ කර්මාන්තශාලාවල රැකියාවේ නියුතු කම්කරුවන් මෑන්පවර් සහ දෛනික වැටුප් ලබන සේවකයින් සමඟ හවුල් නේවාසිකාගාරයක ජීවත්වන නිසා, දෛනික වැටුප් ලබන සේවකයින්ට රැකියාවක් සොයාගැනීමේ අපහසුතාවය තිබේ. එසේම, මේ අවස්ථාවේ දී ආණ්ඩුව විසින් මෙවැනි සේවකයින් සඳහා සුබසාධනය සළසාදීමක් ක්‍රියාවට නංවා නොමැති නිසා, ඔවුන් විශේෂයෙන්ම අනතුරට නිරාවරණය වී සිටියි. එසේම, සේවකයින්ට නිරෝධායනය වීමට සිදු වී ඇති දරුවන් සහ ගර්භනී මව්වරුන්ද සිටින ඇතැම් නේවාසිකාගාරවල දී මෙම සේවකයින් පිළිබඳව කිසිදු බලධාරියෙකු වගකියනු නොලබන බැවින් ඔවුන්ට බොහෝ අභියෝගවලට මුහුණ දීමට සිදු වී තිබේ.
එසේම, වසංගතය තුළ දී සෞඛ්‍ය සහ ආරක්ෂක ක්‍රියාමාර්ග භාවිතයට ගැනීම සේවකයන් විසින් උල්ලංඝනය කිරීම ද සිදු වේ. මෙය ඉතාම බරපතල ලෙස සැළකිල්ලට ගතයුතු ගැටලුවකි.
කටුනායක ඇවරිවත්තේ සහ අමන්දොලුව ප්‍රදේශයේ නේවාසිකාගාර තුළ සේවකයින් 65 දෙනකු පමණ ආසාදිත බව පරීක්ෂණ මගින් නිරාවරණය වී තිබේ. සියලුම නිරෝධායන මධ්‍යස්ථාන පිරී ඇති බවත්, නිරෝධායන මධ්‍යස්ථානවල ඉඩ ලැබුණු වහාම ඔවුන්ව නිරෝධායන මධ්‍යස්ථානවලට රැගෙන යන බවත් පවසා ඇති අතර, ඔවුන්ගෙන් බොහෝ දෙනා තවමත් නිරෝධායන මධ්‍යස්ථාන කරා ගෙනගොස් නැත. එම නිසා, වෛරසය ආසාදිත වූ බවට පරීක්ෂණ මගින් නිරාවරණය වූ සේවකයින්ට තමන්ගේම නේවාසිකාගාර තුළ නිරෝධායනයට ලක්වීමට සිදු වී තිබේ. ඒවායේ තවමත් රැකියාවට යන සේවකයින් සමඟ එකම නවාතැන තුළ ඔවුන් ජීවත් වේ. මෙහි ප්‍රතිඵලයක් ලෙස නේවාසිකාගාර තුළ අනියතභාවයක් ඇති වී ඇති අතර, මෙම කම්කරුවන්ගේ දුක්ඛිත තත්වය සම්බන්ධයෙන් කිසිදු අධිකාරියක් වගකීම භාර නොගන්නා හෙයින්, ඔවුන්ගේ ජීවිත විශාල අවදානමකට ලක් වී තිබේ. ඇතැම් අවස්ථාවල දී ආසාදිත යැයි පරීක්ෂණ මගින් නිරාවරණය වී දින පහකට පසුවවත්, ඔවුන් නිරෝධායන මධ්‍යස්ථාන කරා ගෙනගොස් නැති අතර ආසාදිත කම්කරුවා ජීවත් වූ හවුල් නේවාසිකාරය කිසිදු ජීවානුහරණයකට ද ලක්කර නැත. පැහැදිළි සැළසුමක් නොමැති බවත්, ඉහළින් පැහැදිළි උපදෙස් ලැබෙන තුරු ඔවුන්ට කිසිවක් කළ නොහැකි බවත් මහජන සෞඛ්‍ය පරීක්ෂකවරුන් විසින් සේවකයින්ට පවසා තිබේ.
කටුනායක පිහිටි එක්තරා නේවාසිකාගාරයක, එක් සේවකයෙකු නිරෝධායන මධ්‍යස්ථානයකට ගෙනගොස් තිබුණේ වෛරසය ආසාදිත බව පරීක්ෂණ මගින් අනාවරණය වීමෙන් දින 3 කට පසුවය. දින හතකින් පසුව ඔහුව නැවතත් නේවාසිකාගාරය වෙත රැගෙන එන බව ඔවුන්ට පවසා තිබේ. නමුත් නිරෝධායනය වීමේ දින 10 අවසන් කිරීමකින් තොරව ඔහුව නැවතත් වේලාසනින්ම නේවාසිකාගාරය වෙත ගෙනවිත් තිබුණේ නේවාසිකාගාරයේ සිටින ඔහුගේ ගර්භනී බිරිඳ මෙන්ම අනෙකුත් සේවකයින් ද විශාල අවදානමකට හෙළමිනි.
තවත් සේවකයින් ද එහි නිරෝධායනය වෙමින් සිටියි. එහි නිරොධායනයට ලක්වන කාමර 21 ක ජීවත්වන විවිධ කර්මාන්තශාලාවලට අයත් කම්කරුවන් 44 දෙනෙකු සඳහා (සේවකයින් දෙදෙනෙකු හැරෙන්නට) දින 5 ක් දක්වා කිසිදු සහන සලාක ද්‍රව්‍යයක් ලබාදී නොතිබුණි. විශේෂයෙන්ම මෑන්පවර් සේවකයින් බරපතල ලෙස පීඩාවට ලක් වී සිටින අතර ඔවුන්ගේ යහපැවැත්ම සඳහා කිසිවකු වගකීම භාරනොගන්නා බැවින් ඒ බොහොමයක් දෙනා නිරාහාරව සිටිති.
සේවකයින් 75 දෙනෙකු වාසය කරන කටුනායක ඇවරිවත්තේ නේවාසිකාගාරයක සඳුදා (මැයි 10වන දා) සේවකයින් දෙදෙනෙකු ආසාදනය වී තිබෙන නමුත්, තවමත් ඔවුන් රෝහලකට/නිරෝධායන මධ්‍යස්ථානයකට ගෙනගොස් නැත. ආසාදිත කම්කරුවන් දෙදෙනාගේ සේවා යෝජකයින් විසින් ඔවුන්ගේ කර්මාන්තශාලාවේ රැකියාවේ නියුතු සේවකයින් සඳහා වැසිකිලියක් හා නානකාමරයක් සදා තිබේ. නමුත්, මේ සේවකයින් දෙදෙනා තමන්ගේ සියලුම වැඩකටයුතු තමන් විසින්ම සිදුකරගන්නා නිසා, ඇත්ත වශයෙන්ම අනතුරුදායකත්වය අඩුවේදැයි ගැටලුවක් තිබේ. එසේම එහි විවිධ කර්මාන්තශාලාවල සේවකයින් සිටියි. එසේම මෙම නේවාසිකාගාරයේ තවමත් රැකියාවට යන මෑන්පවර් සේවකයෝ ද පදිංචි වී සිටිති. මෙම තත්වය ඉතාම භයානක වන අතර, වෛරසය වේගයෙන් පැතිරීයාමේ ඉහළ අනතුරුදායී බවක් තිබේ. නේවාසිකාගාර හිමිකරුවාට තම වියදම සඳහා ග්‍රාම නිලාධාරීවරයා විසින් රු. 10,000 ක් ලබා දී තිබුණද අන් අය ඡන්ද දායක ලයිස්තුවේ නොමැති නිසා එය ලබා දී නැත.
*තුන් නිවුන් පවුලක එක් අයෙකු කම්හලක කම්කරුවකු ලෙස සේවය කරන අතර, ඇයගේ සහෝදරියක් පිළිකා රෝගයෙන් පෙළෙන මව සමඟ ජීවත් වේ. ඇයගේ තුන්වන සහෝදරිය ද ඇගේ නේවාසිකාගාරයේ නවාතැන් ගෙන සිටී. ඇයගේ මව සමඟ ජීවත්වන සහෝදරියට මෑතක දී කෝවිඩ් 19 වෛරසය ආසාදනය වීම නිසා, ඔවුන් හා ස්පර්ෂයෙන් වෛරසය වැළඳීමට ඉඩ ඇතැයි පවසා නේවාසිකාගාර හිමිකරුවා විසින් ඇයටත් ඇයගේ පවුලටත් නේවාසිකාගාරයෙන් ඉවත්ව යන ලෙස පවසා තිබේ. එබැවින්, දැන් ඇගේ ස්වාමිපුරුෂයාට, දරුවාට, සහෝදරියට සහ ඇයට තමන්වම අනතුරේ හෙළමින් තම මව සමඟ ජීවත්වීමට යාම හැර වෙනත් විකල්පයක් නැත. ඊයේ මැයි 9 දා මධ්‍යම රාත්‍රියේ දී මහජන සෞඛ්‍ය පරීක්ෂකවරයා පැමිණ ඇයගේ සහෝදරිය හෝටලයකට රැගෙන ගොස් තිබේ(ආසාදිත බව නිරාවරණය වීමෙන් දින 5 කට පසුව). ඇයව පළමුවෙන්ම මැයි 9 වන දින භාරයට ගැනීමෙන් පසුව වෙන කොතැනකට ගෙනයනු ලබන්නේ දැයි ඇයට කිසිදු අදහසක් තිබී නැත. පළමු රාත්‍රිය සඳහා ඇයට ආහාර ලැබී නොතිබුණ නමුත්, ඇයගේ රැකියා ස්ථානයෙන් ඇයට විස්කෝතු කිහිපයක් ලබා දී තිබුණි. ඇය විසින් ඒවා ආහාරයට ගෙන තිබුණි. එය කිසිදු සුවිශේෂී සැළැස්මක් බව පෙනෙන්නට නොතිබුණ අතර, ඇයගේ සහෝදරියට අපහසුතාවයන් ඇති වී පුපුවේ වේදනාවන් ඇති වී තිබුණි. ඇයට විටමින් සී ලබා දී ඇත.
ඉහත සියලු තොරතුරු සැලකිල්ලට ගැනීමේ දී, නිදහස් වෙළඳ කලාපීය ප්‍රදේශය තුළ තවදුරටත් කෝවිඩ් -19 පැතිරීම කළමනාකරණය කිරීමට සහ පාලනය කිරීමට රජය විසින් හදිසි සැලැස්මක් සකස් කළ යුතුව ඇති බව ඉතාම පැහැදිලිය.
අහඹු PCR පරීක්ෂණ සිදුකෙරෙනු ලැබූව ද, කටුනායක නිදහස් වෙළඳ කලාපය තුළ සියලුම කර්මාන්ත ශාලා ක්‍රියාත්මක වෙමින් පවතින අතර, මෑතක දී කෝවිඩ් වෛරසය ආසාදිත යැයි සොයා ගන්නා සේවකයින්ගේ සංඛ්‍යාවේ තියුණු ඉහළ නැගීමක් පවතී.
[ජේ. කේ ගාමන්ට්ස් ප්‍රයිවට් ලිමිටඩ්, ලියනගේමුල්ල, කටුනායක]
ඔවුන්ට මුල දී කෝවිඩ් වෛරසය ආසාදිත සේවකයින් 12 දෙනකු පමණක් හමු වූවද, එය සතියකින් සේවකයින් 55 දක්වා ඉහළ නැගුණි.
[ඇන්සල් ලංකා ප්‍රයිවට් ලිමිටඩ්, බියගම]
වෛරසය ආසාදිතැයැයි වාර්තා වූ සේවකයින් සංඛ්‍යාවේ නිල සංඛ්‍යාලේඛන නොමැති වූවද, නිල නොවන සංඛ්‍යාලේඛනවලට අනුව මේ අවස්ථාවේ දී වෛරසය ආසාදිත වූ සේවකයින් 100 කට වඩා සිටියි.
[කෝටොල්ඩ්ස් ක්ලෝතින් ලංකා (සීසීඑල්) ප්‍රයිවට් ලිමිටඩ් කටුවැල්ලේගම, මීගමුව]
කර්මාන්ත ශාලාව තුළ සිදුකල අහඹු PCR පරීක්ෂණයකින් කෝවිඩ් – 19 වෛරසය සඳහා සේවකයින් 50 දෙනෙකු ආසාදිත බව දැනගන්නට ලැබුණි. ඉන්පසු, මැයි මස 07වන දින කර්මාන්තශාලාව වසා දැමුණු අතර සියලුම සේවකයින් PCR පරීක්ෂණවලට ලක්කරනු ලැබීය. පරීක්ෂණ ප්‍රතිඵල මැයි 10 වන දා නිකුත් විය. ආසාදිත සේවකයින් සංඛ්‍යාව 300 දක්වා ඉහළ නැගුණු අතර, කම්කරුවන් 150ක් දෙනා තවදුරටත් සේවයේ යෙදෙමින් කර්මාන්තශාලාව 10 වන දින විවෘතව තැබුණි.
[සිරියෝ ලිමිටඩ්, බඩල්ගම]
අහඹු ලෙස PCR පරීක්ෂණයකදී ආසාදිතයැයි හඳුනාගෙන ඇති බැවින්, සියලුම කම්කරුවන් මැයි 07 වන දින පරීක්ෂාවට ලක් කරන ලදී.
[නෙක්ස්ට් මැනුෆැක්චරින් (පුද්) සමාගම, කටුනායක]
පළමුව කම්කරුවන් හත්දෙනෙකු ආසාදිත බව හඳුනාගනු ලැබූවද, ආසාදිතයින් සංඛ්‍යාව මේවන විට 100 කට වඩා වර්ධනය වී තිබේ. අද දිනයේ (මැයි 10) දී සේවකයින් 40 කට වඩා ආසාදිත යැයි පරීක්ෂා වී ඇති අතර සවස්භාගයේ දී තවත් PCR පරීක්ෂණ ප්‍රතිඵල ලැබීමට නියමිතය. අනෙකුත් සේවකයින්ට ආසාදනය වී තිබීම හෝ ආසාදිත අයව සමීපව ඇසුරු කිරීම නිසා, කර්මාන්ත ශාලාවේ පේලි දොලහකින් මේවන විට ක්‍රියාත්මක වෙමින් පවතින්නේ පේලි හතරක් පමණි. කම්කරුවන් ඔවුන්ගේ නේවාසිකාගාරවල ස්වයං නිරෝධායනයට ලක්කොට තිබේ. ඇතැම් සම සේවකයින් තුළ ඇස් රතුවීම, උණ තිබීම, කැස්ස වැනි රෝග ලක්ෂණ පෙන්නුම් කර ඇති අතර, රැකියාවෙහි යෙදී සිටියදී ක්ලාන්තවීම ද සිදු වීම නිසා සේවකයින් බියට පත් වී සිටියි. මානව සම්පත් අංශයේ නිලධාරීන් නිවසේ සිට රැකියාවේ කටයුතු සිදු කරන බැවින් කම්කරුවන් වෙනුවෙන් වගකීම භාර ගැනීමට බලධාරීන් කිසිදු අයෙකු නොමැති බැවින් තත්වය විශේෂයෙන් භයානක ය.
ඊට අමතරව, සඳුදා (මැයි 10 වන දින) ආසාදිත බවට නිරාවරණය වූ කම්කරුවන් තවමත් නිරෝධායන මධ්‍යස්ථාන වෙත ගෙනගොස් නැත. පූර්ව ආරක්ෂක ක්‍රියාමාර්ග අනුගමනය කරමින් නේවාසිකාගාරය තුළට වී සිටින ලෙස මහජන සෞඛ්‍ය පරීක්ෂකවරයා විසින් පවසා තිබේ. මැයි 10 වන දින ආසාදිත යැයි නිරාවරණය වූ එක් සේවිකාවක් මේවන විට ඇයගේ නේවාසිකාගාරයේ ස්වයං නිරෝධායනය වෙමින් සිටියි. එම නේවාසිකාගාරයේ තවත් සේවිකාවන් නව දෙනෙකු වාසය කරයි. කෙසේ වෙතත් එම ස්ථානය ස්වයං නිරෝධායනය සිදුවෙමින් පවතින ස්ථානයක් බව දැක්වෙන දැන්වීමක් මහජන සෞඛ්‍ය පරීක්ෂකවරයා විසින් ඔවුන්ගේ නේවාසිකාගාරයේ අලවා නැත. යුනයිටඩ් ටුබැකෝ ප්‍රොසෙසින් (යූටීපී) (පුද්) සමාගම සහ හයිඩ්‍රාමනී ගාමන්ට්ස් කටුනායක (පුද්) සමාගම ආදී වෙනත් සමාගම්වල සේවකයින් ද මෙම නේවාසිකාකාරයේ ජීවත්වන නමුත්, රැකියාවට නොපැමිණෙන ලෙස ඔවුන්ට දැනුම් දී නැත. ඔවුන්ගේ නේවාසිකාගාරය පිටත ස්වයං නිරෝධායන ස්ථානයක් ලෙස දැන්වීමක් අලවා නැති නිසා, ඔවුන්ගේ නිවාඩු කපා දමනු ඇතැයි සේවකයින් බියට පත් වී සිටියි. සේවකයින් නව දෙනාම එක් වැසිකිලියක් භාවිතාකරන අතර, රෝගය ආසාදිත සේවිකාව එය උදෑසන 5.00 ට භාවිතා කරන අතර, අන් අය ඉන්පසුව භාවිතා කරයි. ඔවුන්ට සුදුසු සනීපාරක්ෂක ද්‍රව්‍ය නොමැතිවීම නිසා වෛරසය ව්‍යපාත්වීමේ ඉහළ අනතුරුදායකත්වයක් තිබේ.
ස්මාර්ට් ෂර්ට්ස් (ලංකා) ලිමිටඩ්, ඒටීජී ග්ලව්ස් නිටින් (පුද්) සමාගම, ස්ටාර් ගාමන්ට්ස් (පුද්) සමාගම, නෙක්ස්ට්, ස්ක්‍රීන්ලයින් හෝල්ඩින්ග්ස් (පුද්) සමාගම, ස්කයි ස්පෝර්ට් ලංකා පුද්ගලික සමාගම, ඊසි සේල්, එල්ස්ටීල් සහ බ්‍රැන්ඩික්ස් යන කර්මාන්තශාලාවල සේවකයින් විශාල සංඛ්‍යාවක් ආසාදිත බව පරීක්ෂණ මගින් සොයාගෙන තිබේ.
තමන් රැකියාවට නොගියහොත් එම දින ගණන තමන්ගේ නිවාඩු වලින් කපා දමනු ඇතැයි ඇතැම් කර්මාන්තශාලාවල සේවකයෝ බියට පත් වී සිටිති. ආසාදිත වූ බොහොමයක් දෙනා නිරෝධායන මධ්‍යස්ථාන කරා ගෙනගොස් නැත. එසේම එන්නත්කරන වැඩසටහනක් පිළිබඳව ද දැනුම් දී නැත. නේවාසිකාගාර තුළ දී කම්කරුවන් නිරෝධායනය වන විට එම ස්ථාන නිරෝධායනය සිදුවන සිථාන ලෙස හැඳින්වෙන දැන්වීම් අලවා නොමැති අතර, තමන්ව සහ අන් අයවද අනාරක්ෂිත තත්වයට පත්කරමින් සේවකයින් නවාතැන්වලින් පිටතට යාම සහ නැවතත් ඒවාට පැමිණීම සිදු කරයි. මෙය ඉතාම භයානක තත්වයකි. කම්කරුවන් නිවසේ රැඳීසිටිය හොත් ඔවුන්ගේ වැටුප් කපා දැමෙන බැවින් ඔවුන් නිවසේ රැඳී සිටීමට ද පසුබට වේ. එබැවින් ඔවුන්ට නිවසේ රැඳී සිටිමට ද නොහැකි නිසා ඔවුන් රැකියාවට පැමිණීම සිදු වේ. විශේෂයෙන්ම ස්වයං නිරෝධායනයෙහි යෙදී සිටින සේවකයා තමන්ගේ කර්මාන්ත ශාලාවෙන් නොවේ නම්, කම්කරුවන් සුපුරුදු පරිදි දිගටම රැකියාවට යාම සිදුකරයි. කම්කරුවන් ආසාදිත බව පරීක්ෂා කර ස්වයං නිරෝධායනයකට හෝ මධ්‍යස්ථාන වෙත යවනු ලබන විට දී, ඔවුන්ගේ සමීප ඇසුරුකරන්නන්/ සම සේවකයින් පිළිබඳව ප්‍රමාණවත් පරීක්ෂණයක් සිදු නොකෙරේ.
කෝවිඩ් 19 වෛරසය සඳහා සේවකයින් 300 දෙනකු ආසාදිත බව හඳුනා ගැනීමත් සමඟම බියගම පිහිටි මාස් ඇක්ටිව් ලිනියා ඉන්ටිමෝ කර්මාන්තශාලාව ද ඉතාම දැඩිලෙස බලපෑමට ලක් වී තිබේ. නමුත් ඉතිරි සේවකයින් අඛණ්ඩව රැකියාවේ යෙදෙමින් සිටියි.
ස්ක්‍රීන්ලයින් වැනි සමහර කර්මාන්ත ශාලාවල දී මූලික සෞඛ්‍ය හා ආරක්ෂක මාර්ගෝපදේශ අනුගමනය කිරීමක් සිදු නොවන අතර, කම්කරුවන්ටතම ආරක්ෂාව පිළිබඳව බියෙන් සිටීමට සිදු වී තිබේ. සියලුම කම්කරුවන් මුවවැසුම් පැළඳ අත් සේදිය යුතු නමුත්, එක් යන්ත්‍රයක වැඩකරන නිසා සේවකයින් 15-20 දෙනෙකුට එකිනෙකාට සමීපව වැඩකිරීමට සිදුවී තිබේ. යන්ත්‍ර ජීවානුහරණය කිරීම සිදු කරන්නේ දින 2-3 කට වරක් පමණි.
මාස් ඇක්ටිව් ලිනියා ඉන්ටිමෝ, සිලුඑටා පුද්ගලික සමාගම, සහ ඇන්සල් ලංකා පුද්ගලික සමාගම යන සමාගම්වල සේවකයින් බොහෝ දෙනකු කෝවිඩ් 19 වෛරසය ආසාදිත වී ඇති අතර, වෙනත් කර්මාන්ත ශාලාවල සේවකයින් ද නැවතී සිටින පුද්ගලික නේවාසිකාගාර තුළ ස්වයං නිරෝධායනය වන ලෙස ඔවුන්ට පවසා තිබේ. වෙනත් කම්කරුවන් ද මෙම නේවාසිකාගාරවල ජීවත්වන බැවින්, සහ ඔවුන්ගේ නේවාසිකාගාරවල සිට ඔවුන් රැකියාවට යන බැවින් මෙම නේවාසිකාගාර අසල ජීවත්වන්නන්ට ද කෝවිඩ් වෛරසය ආසාදනය වීම පිළිබඳව අනතුරුදායකත්වයක් තිබෙන අතර, ආරක්ෂක ක්‍රියාමාර්ග ගනු නොලැබුව හොත් වෛරසයේ ඉක්මන් හා වේගවත් ව්‍යාප්තියක් ඇතිවනු ඇත.
[බොඩිලයින් ප්‍රයිවට් ලිමිටඩ්, හොරණ]
මෙම කර්මාන්තශාලාව තුළ කම්කරුවන් 100ක් පමණ කෝවිඩ් 19 ආසාදිත වී ඇති බව පරීක්ෂණ මගින් සොයාගෙන තිබේ. ඔවුන් සඳහා මුදල් හෝ වියළි ආහාර වශයෙන් කිසිදු සහනයක් ලබා දී නැත.
හොරණ පිහිටි ටයෑන් ලංකා ස්ටීල් කම්පනි ප්‍රයිවට් ලිමිටඩ් සහ ලාඕජී සමාගම්වල ද කෝවිඩ් 19 වෛරසය ආසාදනය වීම් විශාල සංඛ්‍යාවක් වාර්තා වී තිබේ. ලාඕජී කර්මාන්තශාලාව මේ මොහොතේ දී වසා ඇති නමුත්, අනෙක් කර්මාන්තශාලා සුපුරුදු පරිදි ක්‍රියාත්මක වෙමින් තිබේ.
[ලලන් රබර් (පුද්ගලික) සමාගම, තිහාරිය හොරගස්මංකඩ]
පසුගිය රැල්ලටම සමානව මේ අවස්ථාවේ දී ද, කම්කරුවන්ට වෛරසය ආසාදිත බව හදුනාගනු ලැබූව ද, ප්‍රවෘත්තිය පිටතට යනු ඇතැයි බියෙන් කර්මාන්තශාලා හිමිකරුවන් විසින් PCR පරීක්ෂණ සිදුකර නැත.
[ඇක්වා ගාමන්ට්, මීගමුව]
ඔවුන්ගේ සේවකයින් 127 දෙනෙකු ආසාදිත බව හඳුනාගනු ලැබූවද, අනෙකුත් සේවකයින් කර්මාන්ත ශාලාවේ අඛණ්ඩව වැඩකරමින් සිටියි.
[මෑන්පවර් කම්කරුවන්]
රැකියාවට පැමිණීමට පෙර පරීක්ෂණයක් සිදුකරගත යුතු යැයි ඇතැම් කර්මාන්තශාලා මගින් බලකර සිටින අතර බොහෝ කම්කරුවන්ට ඒ සඳහා වියදම් කිරීමට නොහැකිය. මෑන්පවර් නියෝජිත සමාගම් ද ඒ සඳහා අනුග්‍රහය දැක්වීම ප්‍රතික්ෂේප කර තිබේ. ඒ නිසා ඔවුන් රැකියාවට නොගොස් නේවාසිකාගාරවල රැඳී සිටියි. ඇතැම් කර්මාන්තශාලාවලින් මෑන්පවර් සේවකයින් රැකියාවේ යොදවාගනු ලැබූව ද, ඔවුන්ට එක් කර්මාන්තශාලාවක් තුළ දිගුකාලීන රැකියාවක් ලැබෙන්නේ නැත. එසේම මේ අවස්ථාවේ දී බොහෝ කර්මාන්තශාලා විසින් මෑන් පවර් සේවකයින් බඳවා නොගන්නා නිසා ඔවුහු රැකියා විරහිතව දැඩි ආර්ථික අර්බුදයන්ට මුහුණ දී සිටිති.
උපුටාගැනීම: වැඩබිම වෙබඩවිය.